Германиянинг “Бавария” клубини ёзда тарк этиб, “Барселона”га кўчиб ўтган ҳужумчи Роберт Левандовскининг каталонияликлар сафидаги маоши миқдори маълум бўлди.
SER Catalonia нашри хабарига кўра, ҳужумчининг маоши ҳар бир мавсумда ўзгариб туради. Роберт солиқларсиз ҳисоблаганда 2022-23-йилги мавсумда польшалик футболчи 10 миллион евро, 2023-24-йилги мавсумда 13 миллион, 2024-25-йилги мавсумда 16 миллион, 2025-26-йилги мавсумда эса яна 13 миллион евро маош олади.
Шунингдек, агар Левандовски 2024-25-йилги мавсумида жами ўйинларнинг 55 фоизидан камроғида майдонга тушса, “Барселона” у билан шартномани бекор қилиш ҳуқуқига эга бўлади. Қўлга киритилган совринлар учун Левандовски 0,3 миллион евродан 1 миллион еврога қадар бонус олади.
Маълумот учун, Ла Лиганинг жорий мавсумида футболчи 4 та ўйинда майдонга тушиб, ҳозирча 5 та гол урган.
