ФИФА терма жамоаларнинг июль ойи бўйича янги рейтинг жадвалини эълон қилди. Унга кўра, Ўзбекистон терма жамоаси июнь ойидаги кўрсаткич - 66-ўриндан бир поғона юқорилашга муваффақ бўлди. 

ФИФАнинг янги жадвалида Ўзбекистон терма жамоаси 488 очко билан 65-ўринни банд этиб турибди. Бу ўтган июнь ойидагидан бир поғона яхшироқ. Июнь ойида икки марта майдонга тушган Ўзбекистон терма жамоаси, Эронга қарши баҳсда Тошкентда мағлубиятга учраб, Ливан билан дуранг натижа қайд этган эди. Ушбу натижалар эса терма жамоамизнинг рейтингдаги ўрни деярли ўзгаришсиз қолганини билдиради. Шундай қилиб, Ўзбекистон терма жамоаси Осиё миқёсида ҳам, МДҲ мамлакатлари орасида ҳам кучли бешликда қайд этилмоқда. 

Жумладан, Осиё миқёсида Япония(20), Австралия (23), Жанубий Корея (28) ҳамда Эрон (50) терма жамоалари, МДҲда эса Россия (13), Арманистон (55), Украина (46) ва Эстония (56) терма жамоалари Ўзбекистондан олдинда бормоқда. Ўзбекистон миллий терма жамоасининг ЖЧ-2014 сўнгги саралаш босқичидаги рақиблари – Қатар ва Ливан терма жамоалари мос равишда ФИФА рейтингининг 98- ва 144-ўринларидан жой олишган. Гуруҳдаги қолган икки рақиб Жанубий Корея ва Эрон терма жамоаларидир.

Умумий рейтингда ҳали ҳам Испания терма жамоаси пешқадамлик қилмоқда. Ундан кейинги ўринларда Германия, Уругвай, Англия  ва Португалия терма жамоалари ўрин олган. Италия, Аргентина, Голландия, Хорватия ва Дания терма жамоалари ҳам кучли ўнликдан ўрин олган.