"Тоттенхэм" клуби Бразилия - Тунис (5:1) ўртоқлик ўйини Ришарлисонга нисбатан мухлисларнинг ирқчиликка асосланган ҳақоратларини қоралади.
“Кечаги Бразилия ва Тунис ўйинида Ришарлисонга нисбатан ирқчилик ҳақоратлари бизни ғазаблантирди. Футболда ҳам, бошқа жойда ҳам бунга ўрин йўқ. Биз сен биланмиз, Ричи!" — дейилади инглиз клуби расмий сайтида чоп этилган баёнотда.
Эслатиб ўтамиз, Франциядаги "Парк де Пренс" стадионида бўлиб ўтган ўйин вақтида трибунадан Ришарлисонга банан улоқтирилганди. Бу футболчи ўз терма жамоасининг иккинчи голини нишонлаётган пайтда содир бўлди. Ришарлисоннинг ўзи ўйин давомида ирқчиликнинг намоён бўлиши учун айбдорларни жазолашга чақирди.
