Ўзбек футболида ўзига хос ном қолдирган футболчилардан бири – Степан Атоян ҳозирда Грецияда фаолият олиб бораётганини яхши билсангиз керак. Яқинда “Нефтчи”нинг собиқ юлдузи билан қисқача суҳбатлашишга муваффақ бўлдик.

- Собиқ жамоангиз “Нефтчи” ва Ўзбекистон терма жамоаси хусусида нима дея оласиз?
- Фарғоналиклар ўйинида сўнгги пайтда ижобий ўзгаришлар кузга ташланмоқда. Жамоа кучлилар билан тенгма-тенг ўйнашга ҳаракат қиляпти. Умуман олганда, фарғоналиклар ҳар доим рақибларга ташвиш туғдириб келишган.

Терма жамоа эса кутилмаганда саралаш босқичини омадсиз бошлади. Лекин шаштни пайсатирмаслик лозим. Ҳали ҳаммаси олдинда.

- Абрамов ўрнига Қосимов келди. Бу ўзгаришга қандай муносабат билдирасиз?
- Нима ҳам дердим, философияни тушунишмайди чоғи. Бир нарсани унутманг. Қосимов зўр ўйинчи бўлган. Аммо мураббийлик осон иш эмас. Ҳали унда етарли тажриба йўқ. “Бунёдкор” бу бошқа масала. Терма жамоа эса...

- Абрамов кўп хато қиларди ва танқидга учрарди?
- Ҳамма ҳам хато қилади. Лекин бу хатолардан тегишли хулоса чиқариш лозим. Терма жамоага келган ўйинчи нима бўлган тақдирда ҳам ўзини кўрсатиши шарт. Мамлакатнинг бош жамоаси – бу қандайдир карвонсарой эмас. Бунга бошқача ёндошиш керак.