Роналдо номи тилга олинганида кўпчилик чалкашиши мумкин. Аммо бугун биз ҳаммага маълум бўлган Роналду эмас, балки бразилиялик Роналдонинг ҳаёти ҳақида қисқача ҳикоя қилмоқчимиз. Хабар қилинганидек, бразилиялик афсонанинг ҳаёти ҳужжжатли филмга муҳрланмоқда. "DAZN" канали у ҳақида аллақачон филм суратга олишни бошлаб юборган. Унинг ўйинчи сифатидаги ҳаёти – Жаҳон чемпионатидаги муваффақияти, "Барселона", "Интер" ҳамда "Реал" каби еттита клуб сафида қилган ишлари кинотасмага мухрланадиган бўлди. Қуйида "Il fenomeno" борасида айрим фактлар тақдим этилади.
Спорт товарлари ишлаб чиқарувчиси бўлган "Nike" консерни Роналдо билан бир умрлик битим тузган. Ушбу шартноманинг умумий қиймати 160 миллион фунт-стерлингни ташкил этади.
Айтганча, юқоридаги филм Роналдонинг футболчилик фаолиятидан ташқари, унинг клуб эгаси сифатида қилган ишларини ҳам ўз ичига олиши айтилган.
У учта клубга – "Крузейро" "Реал Вальядолид" ҳамда "Форт Лодердейл"га сармоя киритади. Роналдонинг ҳомийлиги остида "Вальядолид", ўтган мавсумда Ла-лигага йўл олишга муваффақ бўлганди. Шунингдек, "Крузейро" ҳам яқиндагина Бразилия олий лигасида ўйнаш ҳуқуқини қўлга киритган.
Роналдо қайсидир маънода ўз бизнес империясини ярата олган. У 2011 йилда ўз футболчилик фаолиятини тугатади. Кўп ўтмай, АҚШнинг "Форт Лодердейл" клуби акцияларининг бир қисмини сотиб олади. 2018 йилда эса "Вальядолид"нинг йирик аскиядорига айланган. 51 фоиз акция, у учун 30 миллион фунтга тушган. Ҳозирга қадар бразилиялик афсонанинг испан клубидаги улуши 82 фоизни ташкил этмоқда.
Роналдо спорт маркетинги агентлигига ҳам асос солган. Аммо бу лойиҳанинг ишлари режадаги каби кетмади, анча йўқотишлар юз берди.
Юқорида Роналдо ва "Nike" ўртасидаги битим ҳақида маълумот берган эдик. Майкл Жорданнинг ортидан Роналдо ҳам "Nike" билан бир умрлик битимга имзо чеккан. Бу ҳамкорлик орқали собиқ футболчи 160 миллион фунт ишлаб олади. Бугун "Nike" Роналдо номидан фойдаланган ҳолда "R9" бутсаларини ишлаб чиқармоқда. Ушбу маҳсулот нисбатан анча арзонлиги билан ўзига хосдир. Ҳатто АПЛ футболчилари ҳам айнан "R9" бутсаларини кўплаб харид қилади. Унинг нархи эса 300 фунтгача.
Ўтмишда ҳамма учун севимли бўлган футболчи бугун ўзига хос йўлдан, энг асосийси, футболга алоқадор йўлдан бормоқда.
ИСМАТОВ Ж.
