"Арсенал" мухлиси ҳамда АПЛ ва Англия терма жамоасининг собиқ ҳужумчиси Даррен Бент Мбаппе ҳамда Жезусни солиштирди. У бу танловда Габриэл Жезусни афзал кўришини айтди. Кеча, сешанба куни Мбаппе "ПСЖ"ни тарк этиши ҳақида хабарлар тарқалди. Унга кўра, Мбаппе ҳамда Франция чемпионлари ўртасидаги мунсоабат бутунлай бузилган. Бунга Мбаппега берилган ваъдаларнинг айримлари бажарилмаётгани сабаб бўлган. Қолаверса, ҳужумчига айрим нарсалар ёқмаган. Жумладан, клуб янги марказий ҳимоячи ҳамда Мбаппе билан шерикликда ўйнайдиган ҳужумчи харид қилмоқчи эканини билдирган. Бу эса 23 ёшли футболчининг таъбини хира қилган...
Собиқ инглиз футболчиси Даррен Бентнинг фикрига кўра, Мбаппе ортиқча муаммолар келтириб чиқармоқда. Бу ҳақида Бент шундай дейди: "Мбаппе жамоа ичида муаммолар яратишга мойил бўлиб қолган. Мен унга Холанддан ўрнак олишни тавсия қиламан. У қаерда ўйнашидан қатъий назар, ўзини қандай тутишни билади. Масалан, унинг жамоадан жамоага кўчиши ҳеч қандай муаммоларсиз кечган. У проффесионализмнинг яққол намунасидир. Ҳозирга қадар Мбаппе ҳақида гапирган бўлсак, ҳар доим муаммони ҳам қўшишга мажбур бўлдик. Масалан, у доимо Почеттино билан баҳслашган. Бундай мисолларни кўплаб келтириш мумкин. Ўтган йили у бахтли эмасди. Шу сабаб "Реал"га эркин агент сифатида кетмоқчи бўлди. Кўп ўтмай, янги шартнома тузди. Ҳозир эса яна ҳаётдан хафа. Нима қилиш керак? Ҳа, биламан. Мбаппе феноменал ҳужумчи. Аммо у каби муаммолар яратувчи футболчи билан шерик бўлишни истамас эдим".
Айни чоққа келиб, Мбаппенинг кейинги клуби борасида кўплаб баҳс-мунозаралар янграмоқда. Аммо "ПСЖ" уни "Реал"га сотиш ниятида эмас. "Ливерпуль" ҳужумчи учун ўтган мавсумда қизиқиш билдирган эди. Юрген Клопп ҳам буни тан олган. Шунингдек, Мбаппе учун 2017 йилда "Арсенал" ҳам даъво қилган. У пайтда лондонликларга Арсенал Венгер устозлик қиларди. Мбаппе ҳам "Монако" шарафини ҳимоялаган. Шу сабабдан "Арсенал" ҳам Мбаппе учун даъвогар клублар сафига қўшиб қўйилди. Ҳа, "Арсенал" ҳозирда АПЛ етакчиси, аммо бу Мбаппени сотиб олиш учун етарли бўла олмайди. Бу учун камида ЕЧЛ давраси керак. Бу ҳақида бам Даррен Бент фикр билдирди.
"Айни дамда Мбаппе "Арсенал"га ўтади? Йўқ. Менга Жезуснинг ўзи бўлгани маъқул. Мен бу билан Мбаппени Жезусдан ёмон демоқчи эмасман. Амалда ҳам ундай эмас. Аммо ҳозир "Арсенал" АПЛда етакчилик қилмоқда. Буни бузиб қўйиш керак эмас. Шу нуқтайи назардан ҳам мен Жезусни Мбаппедан устун деб биламан".
Габриэл Жезус "Манчестер Сити"дан ёзда 45 миллион фунт эвазига харид қилинган эди. У ҳозирга қадар жамоада тўпурарга айланди. Жезус "Арсенал"га катта ваъдалар билан олиб келингани аниқ. Негаки, у учун даъвогарлар кўп эди. Мбаппенинг келиши эса ҳаммасини бузиб юборади.
ИСМАТОВ Ж.
