Италиянинг «Милан» клуби хўжайини Сильвио Берлускони ҳимоячи Тиаго Сильва ва ҳужумчи Златан Иброҳимович «ПСЖ»га ўтаётганини тасдиқлади.
«Ҳа, ростдан ҳам Иброҳимович ва Тиаго Сильвани «ПСЖ»га сотадиган бўлдик. Бу бизга тахминан 150 миллион еврони иқтисод қилиш имконини беради», – дейди Берлускони La Gazzetta dello Sport нашрига.
Иброҳимовичнинг маошини тўлаш учун клуб йилига 24 миллион евро ишлатар эди. Швед ҳужумчисининг «Милан» билан икки йиллик шартнома тузганини ҳисобга олсак, бу 48 миллионни тежаш дегани. Тиаго Сильванинг шартномаси эса беш йилга тузилган бўлиб, «Милан» бу вақт давомида бразилиялик ҳимоячига 60 миллион евро тўлаши керак эди.
Аввалроқ «Милан» иккала футболчини 70 миллион еврога сотиши ҳақида информация пайдо бўлганди. Бошқа маълумотларга кўра, келишувнинг умумий миқдори 62 миллионни ташкил этар экан.