"Барселона" "Реал"га қарши бўлиб ўтадиган "Эл-Класико"да махсус формада ўйнайди.
Каталонияликлар Spotify’нинг янги титул ҳомийси испан гигантининг футболкасига машҳур канадалик қўшиқчи Дрейк томонидан яратилган OVO мусиқий лейблининг логотипини жойлаштиришга қарор қилди. "Кўк-анорранглилар" ижтимоий тармоқларида ёзилишича, бундай ҳамкорлик билан "Барселона" мусиқачини ноёб ютуғи билан табрикламоқчи. Эътиборлиси шундаки, Дрейк стриминг хизматида 50 миллиард оқимга эришган биринчи қўшиқчи бўлди.
Spotify жорий мавсум бошланишидан олдин "Барселона"нинг титул ҳомийсига айланди. "Реал Мадрид"га қарши ўйин 16 октябрь, якшанба куни "Сантяго Бернабеу"да бўлиб ўтади. Учрашув Тошкент вақти билан 19:15 да бошланади.
