Бу йилги биринчи лига баҳсларининг дастлабки босқичи якунига етди. Биринчи босқич якунларига кўра, фарм-клубимиз «Машъал-Академия» 12 жамоа орасида 11-ўринни эгаллаб, кейинги этапга йўл ола билмади.

Дилшод Андаев шогирдлари ўтказилган 22 та ўйиннинг 6 тасида зафар қучиб, 16 бор имкониятни бой беришди. Қизиғи, фарм-клубимиз иштирокидаги баҳсларда бирорта ҳам дуранг қайд этилмади. Тўплар нисбати 22-29 кўринишини олди. Натижада 18 очко жамғарган ёш муборакликлар бу йилги иштирокларини биринчи босқичдаёқ тугатишди.

Кейинги босқичга фарм-клубимиздан ташқари «Орол» (9 очко), «Регистон» ва «Сурхон» (ҳар иккаласи 27 очкодан) каби жамоалар ҳам йўл ола билишмади.

Айни пайтда кўпчиликни «Машъал-Академия»нинг бундан кейинги тақдири нима бўлиши қизиқтираётгани бор гап. Бу борада жамоа бош мураббийи Дилшод Андаев билан гаплашганимизда саккиз нафар футболчига жавоб берилгани аниқ бўлди. Булар – Равшан Абдужабборов, Руслан Муродиллаев, Маъмур Абдуллаев, Фаёз Азимқулов, Шохруҳ Достонов, Уйғун Бобоназаров, Шаҳзод Қодиров ва Темур Бекчанов. Таркибда қолганлар эса тўлиқ ўринбосарлар сафига ўтишди. Шунингдек, шу пайтгача «Машъал-Академия»да ишлаган мураббийлар штаби ҳам бундан буён ўринбосарларимиз жамоасида фаолият олиб боришади. Дилшод Андаевнинг маълум қилишича, ўринбосарлар таркибида 20-25 нафар ўйинчи шуғулланади ҳамда иккинчи даврага тайёргарлик 18 июлдан Муборакда бошланади. Фарм-клубимиз эса бу йил ҳисобидан бошқа мусобақада иштирок этмайди ва кейинги йил яна биринчи лига баҳсларида қатнашади.