2007/08 йилги мавсумда Карим Бензема 51 ўйинда 31 та гол урди ва "Лион"га ўз тарихидаги илк олтин дублни қўлга киритишда ёрдам берди. Кейинчалик Карим Франция чемпионатининг энг яхши ўйинчиси деб топилди, шунингдек, Криштиану қўлга киритган "Олтин тўп" учун даъвогарлар рўйхатига киритилди.

Ўша мавсумнинг апрель ойида "Барселона" спорт директори Чики Бегиристайн франциялик футболчини ўз сафига қўшиб олиш борасида музокаралар олиб бориш учун Лионга учиб кетди. Бегиристайн узоқ музокаралардан сўнг "Лион" билан Каримни 30 миллион еврога трансфер қилиш борасида келишувга эришди, бироқ...

Спорт директорининг қатъий ишончига қарамай, "Барселона" раҳбариятининг бошқа аъзолари бу келишувга у қадар ишонч ҳосил қилишмади. Улар Каримнинг Испаниядаги ҳаётга мослаша олишига шубҳа қилишди.

Каталон клуби раҳбарияти Бензема ҳудди Николя Анелька "Реал" сафида ўзини кўрсата олмаганидек "Барселона"да ўйини чиқмаслигига ишонишди

"Барса" спорт директори Бегиристайн эса бирон бир таклиф билдиришдан олдин Бенземанинг ўзи билан танишишга қарор қилганди. Ушбу разведка миссияси тўғридан-тўғри Бенземанинг Брондаги уйига боришни талаб қилди. У ерда Бегиристайн Бензема улғайган жойни ўз кўзи билан кўрди ва трансфердан бош тортди. Менежер Франк Райкард билан якуний маслаҳатлашувдан сўнг "Лион"га "Барселона" келишувдан воз кечаётганини айтди.

Бир йилдан сал кўпроқ вақт ўтгач, яна бир карвон (лекин бу сафар Мадриддан) Брондаги ўша камтарона уйнинг эшигини таққиллатди. Бу Мадрид клуби президенти Флорентино Перес эди...