Ўзбек футболининг 100 йиллиги тантаналари 28 август куни ўтказилиши режалаштирилмоқда. Бу ҳақда Ўзбекистон футбол федерацияси (ЎФФ) Фахрийлар кенгаши раиси Наримон Жалолов футбол бўйича Ўзбекистон Биринчилигининг 2-босқич ўйинларига қуръа ташлаш маросимида вилоятлар футбол федерациялари вице-президентларидан вилоятлар футболи ривожига катта ҳисса қўшган фидойилар тўғрисида маълумот тақдим этишни сўраб мурожаат этганида эълон қилди.

Наримон Жалолов тантаналар қаерда бўлиб ўтиши тўғрисида маълумот бермади.

ЎФФ томонидан 2012 йилнинг февраль ойида эълон қилинган ўзбек футболининг 100 йиллик юбилейини нишонлаш бўйича тадбирлар режасига кўра, тарихий сана бўйича тантаналар Тошкент шаҳрида янги қурилаётган “Бунёдкор” стадионида ўтказилиши кўзда тутилган.

Ҳозирги кунгача Чилонзор туманида жойлашган янги “Бунёдкор” стадионининг томлари ёпиб бўлинган, айни вақтда стадион ва унга ёндош ҳудудлардаги обектларда сўнгги қурилиш ва пардозлаш ишлари олиб борилмоқда. Кўп эҳтимолки, қурилиш ишлари 28 августга якунланиб бўлади ва ўзбек футболининг 100 йиллиги тантаналарига “Бунёдкор” стадиони мезбонлик қилади.