Лондоннинг "Арсенал" клуби раҳбарияти жамоа ҳужумчилари Андрей Аршавин ва Никлас Бендтнерлардан шу ёзги трансфер ойнаси ёпилгунича воз кечиш ниятида.

Лондонликлар бугун Жануби-шарқий осиё бўйлаб турнега йўл олишади. Ушбу сафар олдидан юқорида номлари келтирилган икки футболчи ҳам таркибга киритилмаган. Жамоани яқин кунлар ичида тарк этиши кутилаётган "Арсенал" сардори Робин Ван Перси ҳам жамоа билан сафарга кетмайдиган бўлди.

Эслатиб ўтамиз, Андрей Аршавин ўтган мавсум ярмини ўзининг собиқ жамоаси, Санкт-Петербургнинг "Зенит" сафида ижарада ўтказди. Айни пайтда россиялик ҳужумчининг ижара муддати тугаган ва у яна Лондонда жамоа билан мавсумга тайёргарчилик кўраётган эди. Аршавинга ҳозирги кунда Қатар суперлигасининг бир нечта жамоаларидан такифлар бўлмоқда. Унинг таҳминий трансфер нарҳи 4-5 миллион евро сифатида баҳоланмоқда.

Даниялик ҳужумчи Никлас Бендтнер эса бутун ўтган мавсумни премьер-лиганинг бошқа бир жамоаси "Сандерленд"да ўтказди. Айни пайтда иккала клуб ҳужумчининг трансфери борасида музокара олиб бормоқда.