"Ливерпул"нинг 3 нафар футболчиси қишки трансфер ойнаси олдидан сотувга қўйилди. Гап ҳимоячи Натаниел Филлипс, ярим ҳимоячилар Наби Кейта ва Алекс Окслейд-Чемберлен ҳақида кетмоқда. Бу ҳақда Calciomercato нашри хабар бермоқда.
25 ёшли Натаниел Филлипс "Болтон" тарбияланувчиси. У 2016 йилда “Ливерпул”га келиб қўшилганди, бироқ ўшандан бери жамоа сафида 25 та ўйинда майдонга тушди ва аксарият қисмини ижара асосида ўтказди. Томонлар ўртасидаги келишув 2025 йилда якунига етади.
27 ёшли Наби Кейта "Ливерпуль" томонидан 2018 йилнинг ёзида "Лейпциг"дан 60 миллион евро эвазига сотиб олинганди. Бу мавсумда ярим ҳимоячи "Манчестер Сити"га қарши Суперкубок баҳсида атиги 5 дақиқа ўйнади ва ҳозирда у жароҳатидан тикланмоқда.
29 ёшли Окслейд-Чемберлен 2017 йилнинг ёзида 38 миллион евро эвазига "Арсенал"дан "Ливерпул"га ўтган эди. У жорий мавсумда Премьер-лиганинг иккита ўйинида 15 дақиқа майдонда ҳаракат қилди.
