"Арсенал" ҳужумчиси Габриэль Мартинелли Қатарда бўлиб ўтадиган жаҳон чемпионати учун Бразилия терма жамоасига чақирилгани ҳақидаги танқидларга жавоб берди.
“Менимча, ҳаммаси жойида. Бразилиядаги баъзи одамлар мени танимайдилар ва бошқа ўйинчилар ҳам жамоада бўлишга лойиқ деб айтиш мумкин. Мен бу борада анча хотиржамман.
Мен ўз клубимда нима қилаётганимни биламан, қобилиятимни биламан. Бразилия учун бор кучимни ишга солишимга ишончингиз комил бўлсин. Жамоага ҳамма нарсада ёрдам бераман. Бу мен учун ажойиб тажриба бўлади", - дея бразилиялик футболчининг сўзларини келтиради Mirror.
Мартинелли 21 ёшда. У 2019 йилдан бери "Арсенал"да ўйнамоқда. Бразилиялик ҳужумчи жорий мавсумда Лондон клуби сафида Премьер-лигада 13 та ўйинда майдонга тушиб, 5 та гол урди ва 2 та голли узатмани амалга оширди.
Қатардаги жаҳон чемпионати 20 ноябрдан 18 декабрга қадар бўлиб ўтади.