Россия футбол иттифоқи 2013 йилда бўлиб ўтадиган Ҳамдўстлик кубоги мусобақаси учун Ўзбекистон футбол федерациясига таклифнома юборди. Бу ҳақда ЎФФ матбуот котиби Санжар Ризаев ўз Твиттери орқали хабар тарқатди.
Хабарингиз бор, 2012 йилги мусобақадан бошлаб, Ҳамдўстлик кубоги мусобақаси 21 ёшгача бўлган ёшлар ўртасидаги мусобақага айланган ва унда МДҲ ва Болтиқбўйи давлатлари терма жамоалари иштирок этиши режалаштирилган. 2012 йил январь ойида бўлиб ўтган турнирда ўзбекистонлик ёшлар иштирок этишмади. Умуман ўша мусобақада 12та терма жамоа иштирок этди.
Бу сафар мусобақада 16та терма жамоа иштирок этиши кутилмоқда. 2013 йилнинг 17-27 январь кунлари Санкт-Петербурга шаҳрида бўладиган мусобақада 1991 йилда туғилган футболчилардан иборат терма жамоалар таклиф қилинган.
Демак, ЎФФ РФИга розилик хатини юборса, Евстафеев бошчилигидаги Ўзбекистон (U22) терма жамоаси Ҳамдўстлик кубогида қатнашади.