Аввал хабар қилганимиздек, бугун “Насаф” футбол клуби  қароргоҳида давралар оралиғида жамоага келиб қўшилган янги футболчиларни тақдимот маросими ўтказилди.

Унда жамоа бош мураббий ҳамда куни кеча жамоа билан шартномага имзо чеккан икки нафар футболчи – Владимир Шишелов ва Александр Петрович иштирок этишди ва журналистлар саволларига жавоб қайтаришди.

- Давралар оралиғида Украинанинг “Говерла” клуби сербиялик химоячимиз  Боян Малишичнинг трансферини сотиб олди, — дея сўз бошлади “Насаф” устози. — Шунингдек, йил сўнггига қадар икки нафар ҳужумчимиз - Илҳом Шомуродов “Бунёдкор”га, Носир Отақўзиевни “Олмалиқ” жамоасига ижарага берилди. Иккинчи давра олдидан таркибимизга икки нафар футболчини таклиф этдик. Бу — сербиялик Александр Петрович ва Владимир Шишелов. Петровични давралар оралиғида ўқув-йиғин машғулотларига таклиф этдик ва бир қатор ўйинларда синовдан ўтказдик. Унинг ҳаракатлари бизни қаноатлантирди ва у билан битимга имзо чекдик. Владимир Шишеловни эса мухлисларга ортиқча таништиришни ҳожати йўқ. У биринчи даврада “Андижон” жамоасида тўп тепган ва ўзининг тўпурарлик салоҳияти билан ажралиб турди. Умид қиламанки, ҳар иккала футболчини  иккинчи даврада бизга катта ёрдами тегади.

Шундан сўнг ҳар иккала футболчига ўйин давомида майдонда ҳаракат қиладиган футболкалари тақдим этилди. Ҳимоячи Петрович “Насаф” сафида 25-рақам остида ҳаракат қилса, Владимир Шишеловга  эса 55-рақам тақдим этилди.