Португалия терма жамоаси сардори Криштиану Роналду ўтган ҳафтада бутун дунёни лол қолдирганди. У Пирс Морган билан бўлган суҳбатда "МЮ"даги ҳолати ҳақида гапириб, жамоадаги кўпчиликни танқид остига олган. Ушбу воқеадан кейин "Манчестер Юнайтед" Роналду борасида қонуний чора кўришини эълон қилганди. Аниқроқ қилиб айтадиган бўлсак, манкунианликлар раҳбарияти 37 ёшли футболчи билан бир йил олдин тузилган 16 миллион фунтлик битимни муддатидан олдин тугатиш ниятида. Аммо Роналду бўйсунмоқчи эмас. Унга "МЮ"нинг ҳаракатлари таъсир кўрсатмайди. Бу ҳақида ҳужумчининг ўзи Ганага қарши ўйин олдидан бўлиб ўтган матбуот анжуманида айтиб ўтди.
"Бу ерда муҳит яхши, ҳеч қандай муаммо мавжуд эмас. Жамоа билан эътиборни фақат олдимиздаги ўйинга қаратганмиз. Сизлар менга ёрдам беришингиз мумкин. Мен ҳақимда гапиришни тўхтатишингизнинг ўзи, катта ёрдам бўлади, мен учун. Агар сиз (журналистлар) ўзга футболчидан мен ҳақида сўрашни давом эттирсангиз, жаҳлим чиқади. Мендан Жаҳон чемпионати ва жамоа ҳақида сўранг. Мен бундан фақат хурсанд бўламан. Аммо мен ва "МЮ" ўртасидаги муаммолар ҳақида эмас! Агар сизлар деярли 38 ёшга кирган футболчидан ниманидир исботлашни сўрасангиз, мени ташвишга қўйган бўласиз. Ҳозирга қадар қилган ишларим, ҳамма учун етарли деб ўйлайман. Албатта, мен ҳали ҳам ўзимга билдирилган ишончни оқлашим лозим. Ҳамманинг мен ҳақимда ўзига хос фикрлари бор. Мен учун тўғри танлов қилиш жуда муҳим. Мен ҳақимда бўхтонларни ёзиб чиқаришдан осони йўқ. Бироқ, менинг танловим - бу меники ва бошқаларнинг фикри мени қизиқтирмайди. Аминманки, бу воқеалар терма жамоага таъсир ўтказмайди. Бу ердаги футболчилар ва мураббийлар мен ким эканимни, нималарни ўйлаётганимни яхши билади. Жамоадагилар мени 11 ёшимдан бери билишади. Шундай экан, уларга ҳам худди мен каби одамларнинг нима дейиши ёки нимани ёзиши муҳим эмас".
Роналду "МЮ"ни ўзига нисбатан ҳурматсизлик ва хиёнатда айблаганди. Шундан кейин, раҳбарият бу масала борасида қонуний йўл тутишини билдирган. Айни дамда эса "МЮ" Роналдуни мундиалдан кейин жамоага қайтиб келишини истамайди. Шу сабабли, унинг ҳафтасига 500 минг, икки йилга эса 16 миллион фунтлик қийматга эга бўлган битимини тугатиш пайига тушган.
Шунингдек, Роналду терма жамоа сафида Фернандеш ҳамда Канселу билан бўлган воқеаларга ҳам изоҳ бериб кетди. У шундай дейди:
"Мен Бруну билан кўп ҳазиллашаман. Ўша куни у машғулотларга кеч келди. Бунинг сабаби эса рейснинг қолдирилгани эди. Мен унга ҳазиллашиб: "қайиқда келдингми, нима бало?" дедим. Медиа эса буни бўрттирди. Канселу билан ҳам шунга ўхшаш вазият эди. У Фелиш билан қаттиқ тўқнашиб кетди. Мен эса уни руҳлантириш учун бўйнидан ушлаб: "дадил бўл!" деб тасалли бердим. Мана шунақа. Аммо ҳамманинг кўзи Роналдуда. У билан бўладиган воқеаларнигина кўришади. Яна қайтараман, жамоадаги муҳит ажойиб. Ҳеч қандай муаммо йўқ. Биз ҳозир фақатгина Гана билан ўйинни ўйлаяпмиз".
Эслатиб ўтамиз, Португалия терма жамоаси H гуруҳида Гана, Уругвай ҳамда Жанубий Корея билан баҳс олиб боради.
ИСМАТОВ Ж.
