Мавсумнинг энг сермаҳсул футболчиси учун энг мақбул вариант қайси?
Айни дам Коди жорий мавсумда 28 та ўйинда майдонга тушиб, "ПСВ" ва миллий терма жамоа сафида 16 та гол ва 18 та голли узатмани амалга оширди. Ҳатто Холанд ва Неймар, Месси ва Мбаппе ҳам бундай «гол плюс пас» статистикаси билан мақтана олмайди. Гакпо энди ЖЧ-2022да қутқарувчилардан бирига айланди. Голландия турнирда иккита ёмон ўйин ўтказди, аммо ҳужумчи ёрдамга келди. Гакпо Депайдан кейин Голландия терма жамоаси сафида жаҳон чемпионатида кетма-кет икки учрашувда гол урган иккинчи футболчига айланди. Кўп қиррали ҳужумчи ўтган ёзда трансфер муҳокамасига сабаб бўлганди ва ҳозирда потенциал харидорлар фаоллашган. Унга тўртта номзод борлиги ҳақида хабар берилди. Ҳаммаси жиддий жамоалар, аммо футболчининг иштаҳаси бунга йўл қўярмикан – Гакпонинг шартномасини ҳамма ҳам кўтара олмайди, айниқса "ПСВ" ЖЧ-2022да порлаган ўйинчи учун қўшимча тўловни ҳисобга олиб, 60-70 миллион евро сўраса керак.
«Реал»
Анчелотти жамоасида Гакпо билан нима қилиш мумкин? Азарнинг кетиши аниқ. Кварацхелия тезда «Реал»га ўтиши даргумон. Родриго одамлар ўйлагандан кўра қимматроқ, аммо эсда тутингки, Карим жароҳат олган тақдирда нидерландиялик футболчи ўз ишини кўрсатиши мумкин. Бироқ иккаласи ҳам марказий ҳужумчи эмас. Ван Нистелрой жамоасида Гакпо марказдан кўра чап қанотда кўпроқ ўйнади. Ва бу яхшироқ бўлди, чунки у кучли дриблингга эга, тўпни техника орқали суришни яхши кўради, рақиблар қуршовида жангга киришни яхши кўради. Ва шу билан бирга, Коди ўзининг катта бўйи билан охир-оқибат муносиб марказ ҳужумчисига айланиши мумкин. «Реал Мадрид» учун унинг номзоди устувор эмаслиги аниқ. Чунки, Винисиус голландиялик футболчи ўйнашни яхши кўрадиган чап қанотда мустаҳкам ўрнини топди. Лекин Перес Мбаппени олмаган бир пайтда шунчаки бир номзод холос.
«Ливерпуль»
Мане кетди ва бу жамоа натижасида кўринди. Премьер-лига жадвалида «қизиллар» анча пастки ўринга тушиб кетди. Ҳужум чизиғи учун Дарвин Нуньес билан шартнома имзоланди ва бундан олдин чап томонга Луис Диас қўшиб олинди, у дарҳол оммага ёқди. Аммо колумбиялик ўйиннинг бошланғич даражасини сақлаб қола олмади. Салоҳ Манесиз ва Фирминосиз қолди, чунки Роберто янги мавсумда дарҳол «Ливерпул»нинг марказида ўйнамади, Жотанинг жароҳати жамоага таъсир қилди. Юрген шунчаки янгиликни қидирмоқда. Балки голландиялик футболчи таркибга яхши мослашиб кетар. «Ливерпул»да нидерландиялик ўйинчи бор эди, клуб уни йўқотиб қўйганида қадрини англадилар - Вейналдум. Эффектив Мане чап қанотдан марказга ўтганини ҳисобга олсак, унинг позициясида Гакпо албатта ўйнай олади.
«Бавария»
«Бавария» ёзда Шупо-Мотинг билан ҳужумда қолишга қарор қилди - дарвоқе, Эрик дарҳол ҳужум марказида ўйнамади. Кан ва Салиҳамиджич трансфер бозорида Левандовскини тўлиқ алмаштирадиган футболчини қидирмасликка қарор қилишди. Бу тушунарли, Лева жуда муҳим эди. У қанотларда Гнабри, Мане, Коман ва Сане каби кучли футболчилар билан рақобатлашишига тўғри келади. Классик марказий ҳужумчини излаш мантиқан тўғри, чунки Мане, Мюллер ва Мусиала бошқа турдаги футболчилардир. «Бавария» Гакпога пул тикиши даргумон. Коди ҳужум марказидан ўша қанотга ўтиб, Мане билан рақобат қилишига тўғри келади. Ўттиз уч ёшли камерунлик Шупо-Мотинг - бу вақтинчалик чора, ҳамма тушунади. Лекин биринчи навбатда, Нагельсманн кимга қўшимча куч кераклигини ҳал қилиши керак. Улар Гнабрининг кетиши ҳақида гапиришди, агар Серж кетса, янги келганлар ҳақида ўйлашади.
«Манчестер Юнайтед»
Кодини Анри билан таққослаганда, бу орзу-ҳавасдек туюлиши мумкин. У чап қанотда ҳужум қилишни яхши кўради, худди буюк француз каби. Аммо Тьеррининг майдонда бўлган айёрлиги Гакпода такрорланмайди. Бир пайтлар «Манчестер Юнайтед» «янги Анри»ни Марсьяльда кўрган эди, аммо француз ҳозир қаерда? У ўзига билдирилган ишончларни оқлай олмади. Бенземанинг жароҳатидан сўнг «уч ранглилар» устози «Манчестер Юнайтед»нинг марказий ҳужумчисини жаҳон чемпионатига таклиф қилишдан бош тортди. Роналду кетганидан сўнг, ҳужумчи Тен Хагга албатта керак. Гакпонинг ҳужум марказида ўйнай олиши унинг "МЮ"да ўйнаб кета олишини англатмайди. Коди Франция ва Бразилияга эмас, Сенегал ва Эквадорга гол урди. Унинг ўйини ва жамоадошларини пайқаш қобилияти ҳайратланарли, унинг форматидаги ҳар бир ўйинчи у қадар тўпурар бўлолмаслиги мумкин. Голландиялик учун энг қулай позиция - чап қанот.
Глейзерларнинг яна бир қиммат трансфери жамоа учун ҳам, футболчи учун ҳам фойдасиз бўлишини истамаймиз албатта. Шунинг учун "МЮ"га кучли спорт директори керак.
