Бугун, 28 ноябрь куни 2023 йилнинг январь ойида бўлиб ўтадиган Англия кубогининг 3-босқичига қуръа ташлаш маросими бўлиб ўтди. Қуръа ташлашнинг ушбу босқичидаги энг эътиборли жуфтлик “Манчестер Сити” ва “Челси” жамоалари ўртасидаги учрашув бўлди.
Аввалроқ бу жамоалар жорий мавсумда Лига кубогида тўқнаш келишган ва Хосеп Гвардиола шогирдлари ўша ўйинда ғалаба қозонишганди - 2:0. Улар 2023 йил 5 январь куни Англия Премьер-лигасида ҳам ўйнайди.
Англиянинг бошқа топ-клублари ҳам рақибларини билиб олишди. "Манчестер Юнайтед" ўз майдонида "Эвертон"ни қабул қилади. "Ливерпуль" "Энфилд"да "Вулверхэмптон" билан тўқнаш келади ва "Арсенал" "Оксфорд Юнайтед"га сафар қилади. Лондоннинг “Тоттенхэм” жамоаси ўз стадионида “Портсмут” билан ўйнайди.
