"Реал" ярим ҳимоячиси Эдуардо Камавинга Мадрид клубидаги фаолияти ҳақида гапирди.
“Албатта, ҳар бир учрашувда майдонга тушишни хоҳлардим. "Реал Мадрид"да вазият шундай: мен яхши футболчилар билан рақобатлашаман, улар мендан олдинда. Менга ёқади деб айта олмайман, чунки захирада ўтириш унчалик ёқимли эмас.
Футболчи бўлсанг, ҳар бир ўйинда ўйнашни хоҳлайсан. Бу зерикарли демоқчи эмасман, лекин сабр қилиш керак. Мен бутун умр бу ролни ўйнашни хоҳламайман. Мендан олдинда кўплаб футболчилар борлигини тушунишингиз керак. Мен улардан ўрганишим керак, кейин менинг вақтим келади", - дея футболчининг сўзларини келтиради Goal.
Жорий мавсумда 20 ёшли ярим ҳимоячи Испания чемпионатида “Реал” сафида 14 та ўйинда майдонга тушди. Испания чемпионатининг ҳар бир ўйинида у ўртача 36 дақиқа майдонда ўтказади. Ярим ҳимоячи 2022 йилда Қатарда бўлиб ўтадиган жаҳон чемпионатига Франция терма жамоасига чақирилган ва ҳали бирорта ҳам ўйинда майдонга тушмаган.
Камавинга Мадрид жамоасида 2021 йилдан бери ўйнаб келмоқда. "Реал" футболчининг трансфери учун "Ренн"га 40 миллион евро тўлаган.
