Жаҳон чемпионатидаги жамоалар сони бирин-кетин камайиб бормоқда. Аммо мусобақа аввалида айтилган Бразилия номи ўзининг фаворитлик мақомини сақлаб қолди. Аргентинанинг эса кетиб қолишига бир баҳя қолди. Шунингдек, кутилмаганда Дания, Германия ва Бельгия термалари мусобақани тарк этди. Қуйида чемпионлик учун энг жиддий даъвогар жамоалар эслаб ўтилади.
1. Бразилия
Ҳар доим фаворитлар қаторида эътироф этиладиган бу юрт, сўнгги иккита ўнйилликда мундиалнинг финалларигача чиқиб бора олмаётган эди. 2002 йилдан бери Бразилия фақат бир марта чорак-финал тўсиғидан ўта олган холос. Тите шогирдлари нимчорак босқичида қийналмаслиги тахмин қилинган. Гарчанд жамоанинг муҳим аъзолари бўлган Неймар ва Жезус жароҳат олган бўлсада, захирада етарлича футболчилар бор. Бразилия бу сафар 20 йил деганда Европанинг доминантлигига барҳам бериши мумкин.
2. Аргентина
Мессига энг сўнгги имконияти айнан Қатардаги мундиал тақдим этади. Аргентинада ёшлар ва тажрибали футболчилардан тузилган яхши таркиб мавжуд. Жамоа 2019 йилдан бери бирор бир ўйинда мағлубиятга учрамай келаётганди. Аммо бу серияни Жаҳон чемпионатида Саудия Арабистони бузди. Аслида бу мағлубият жамоа фойдасига ишлаган экан. Негаки, гуруҳда иккинчи ўринни олиш, Лионель Скалони бошчилигидаги Аргентинани Францияга қарши чиқишдан асраб қолди ва Австралияга рўбаро қилди. Осиё қитъаси вакилига қарши баҳс Месси ва шерикларига қийинчилик туғдирмади. Энди уларни чорак финалда Нидерландия билан ҳаёт-мамот жанги кутиб турибди.
3. Франция
Франциянинг таркиби жуда ҳам юлдузли. Австралиянинг мағлубиятга учратилиши, шунинг учун ҳам нормал қабул қилинди. Дания эса аммалаб доғда қолдирилди. Учинчи турда Тунисга қарши кутилмаган мағлубият юзага келди. Мухлислар ҳали ҳам Франциянинг Қатардаги фаворит мақомига шубҳа билан қарайди. Кўрамиз, бугун улар Польша қаршилигини енга олармикин...
4. Испания
"Қизил фурия" ҳамма учун бирдек фаворитдек туюла бошлади. Чунки жамоада нисбатан бир хил мавқега эга бўлган ёш, лекин талантли футболчилар кўп. Бу жиҳатдан испанлар анчагина барқарор саналади. Ўтган йили Европа чемпионатидаги ярим финал ҳеч кимга татимаган. Аммо бу юриш келажакдаги фурор кўтариб қайтишга ишора эди. Шундай бўлмоқда ҳам. Аммо Испания "хавфсизроқ" йўлдан юрди. Улар сўнгги турда Японияга ютқазиш орқали, Хорватия чангалидан қутилиб қолди.
5. Англия
Англия ҳақида ҳамма ҳар хил гапиради. Лекин жамоа – ўта юлдузли. Эрон ва Уэльс гуруҳда мағлуб этилди. АҚШ эса дурангга рози бўлди. Аммо 7 очко ҳеч нарсани англатмайди. Нимчорак финал жамоаларнинг ҳақиқий юзини очиб беради. Инглизларнинг бу босқичдаги рақиби эса Африка чемпионлари – Сенегал. Агарда бу тўсиқ енгиб ўтилса, кейинги ўйин, катта эҳтимол билан Францияга қарши кечади (ёки Польшага).
ИСМАТОВ Ж.
