Португалия терма жамоаси ҳужумчиси Криштиану Роналду ва терма жамоанинг яна тўққиз нафар футболчиси Қатарда бўлиб ўтадиган ЖЧ-2022ни тарк этганидан кейин Лиссабонга учмади ва Қатарда қолди. Бу ҳақда Португалия футбол федерацияси хабар берди.
Криштиану Роналдудан ташқари Руи Патрисиу, Рафаэлл Геррейра, Рафаэль Леау, Бруну Фернандеш, Матеус Нуньес, Рубен Невеш, Бернарду Сильва, Жоау Кансело ва Диого Далотлар Қатарда оиласи билан қолишга рухсат олди.
Нуно Мендеш ва Данило Перейра аллақачон жароҳатлари сабаб Қатарни тарк этишган ва Францияда даволанмоқда. Португалия терма жамоасининг қолган футболчилари бугун, 11 декабрь куни Лиссабонга етиб келишади.
Португалия терма жамоаси ЖЧ-2022 чорак финалида Марокаш термасидан мағлуб бўлди (0:1).
