"Манчестер Юнайтед" "Наполи" ва Жанубий Корея термаси ҳимоячиси Ким Мин Чжэга қизиқиш билдирмоқда, деб хабар беради Daily Mirror.

Манбага кўра, ўтган мавсумда жанубий кореялик футболчи "Манчестер Юнайтед"га ўтиши мумкин бўлган, бироқ "қизил иблислар" ўшанда футболчини харид қилмасликка қарор қилган ва натижада у "Фенербахче"га, 2022 йилда эса "Наполи"га ўтган. Ҳозирда, 2022 йилги Жаҳон чемпионатидаги ажойиб ўйинидан сўнг, Премьер-лига клуби Мин Чжэга яна қизиқиш билдирмоқда.

Қатардаги турнирда 26 ёшли футболчи Корея терма жамоаси сафида учта ўйин ўтказди. Жорий мавсумда Ким Мин Чжэ "Наполи" сафида барча мусобақаларда 20 та ўйинда майдонга тушиб, 2 та гол урди. Унинг шартномаси 2025 йилнинг ёзига қадар мўлжалланган.