«Милан» ҳужумчиси Жуниор Мессиас Бразилия терма жамоаси турнирни аллақачон тарк этган бўлсада, Қатардаги жаҳон чемпионатини кузатиб бормоқда.
Мессиас Франция терма жамоасини финалда қўллаб-қувватлашини аниқ айтди, аммо одатда бундай вазиятларда жанубий америкаликлар ўзлари билан бирдам бўлишар эди. Кўпчилик Мессиасдан Аргентина терма жамоасига хайрихоҳ бўлишини кутган бўлса ажаб эмас. Бироқ, Жуниор Тео Эрнандес ва Оливье Жиру туфайли Францияни танлашини тушунтирди.
«Мен улар учун хурсандман. Ҳозир Бразилия мусобақани тарк этганидан сўнг мен Франция терма жамоасини қўллаб-қувватлайман», - дея тушунтирди Мессиас.
