Бразилиянинг "Сан-Паулу" клуби ҳужумкор яримҳимоячиси Лукас Моура "ПСЖ" клуби билан шартномага имзо чекди.
Париж клуби расмий сайтининг хабарича, 19 ёшли футболчи Карло Анчелотти жамоасида 2013йилнинг январидан 2017 йилнинг июнигача тўп сурадиган бўлди. У янги клубига янги йилнинг январидан қўшилади. Келишувнинг молиявий томонлари ошкор қилинмаяпти.
Таъкидлаш жоиз, Моурага "Манчестер Юнайтед" клуби ҳам катта қизиқиш билдирган эди, аммо томонлар келишувга эриша олмаган эдилар.
Моура "Сан-Паулу" клубида 2010 йилдан буён тўп суради. Бу вақт давомида у 72 ўйин ўтказиб, 20 та гол уришга эришган.Айни пайтда футболчи Лондон-2012да қатнашаётган Бразилия олимпия терма жамоаси таркибида бўлиб турибди.













