Адриен Рабьо «Ювентус» билан янги шартнома борасида музокаралар олиб бормоқда. Инсайдер Николо Скиранинг хабар беришича, франциялик ярим ҳимоячи маошини 7 миллион евродан ўн миллион еврога оширишни талаб қилмоқда.

27 ёшли футболчининг «кекса синёра» билан амалдаги шартномаси муддати келаси йилнинг ўрталаригача ҳисобланган.

Агар томонлар келишмаса, Рабьода фаолиятини давом эттиришнинг бошқа имкониятлари бор. Футболчига «Манчестер Юнайтед», «Челси» ва «Тоттенхэм» клублари қизиқиш билдирмоқда.

Франциялик футболчи жорий мавсум «Ювентус» сафида 16 та ўйинда майдонга тушиб, 5 та гол ва 2 та голли узатмага муаллифлик қилган.