Машҳур футбол функционери Марк Овермарс микроинфарктга учради. Бу ҳақда Бельгиянинг «Антверпен» клуби матбуот хизмати хабар берди. 49 ёшли голландиялик мутахассис бу ерда футбол директори лавозимида ишлаётган эди.
Қайд этилишича, Марк Овермарс касалхонага ётқизилганидан сўнг ўзини яхши ҳис қилмоқда, бироқ у бир мунча вақт ишламай туради. «Антверпен» Овермарсга тезроқ тузалиб кетишини тилади.
Марк Овермарс жорий календарь йилнинг март ойида «Антверпен»га келиб қўшилган эди. Бундан сал аввалроқ функционер жанжал туфайли «Аякс»дан ҳайдалган.
