Пуэрто-Рико футбол федерацияси президенти Эрик Лабрадор Испания терма жамоасининг бу мамлакатга ташрифидан ҳис-ҳаяжонга тўлганлигини яшира олмади, дея хабар беради испан матбуоти.
Жаҳон ва Европа чемпионлари 15 август куни Пуэрто-Рико терма жамоаси билан ўртоқлик учрашуви ўтказади. Бу ўйин мамлакатда катта ажиотажга сабаб бўлмоқда.
"Шартномага биноан Висенте дель Боске бу учрашувга Жаҳон ва Европа чемпионлари бўлган ўйинчиларнинг 70 фоизини олиб келиши керак. Бу ўйин мен учун жаҳон чемпионатида қатнашиш билан баробар. Пуэрто-Рико футболининг узоқ йиллик тарихи бўлишига қарамай, бизнинг мамлакатда бундай дабдаба ҳеч қачон бўлмаган эди. Сўзимнинг исботи сифатида шуни айтишим мумкинки, бизда кўп компаниялар футболга катта сармоя киритадилар. Айтишим мумкинки, Испаниянинг ташрифи мамлакат тарихини ўзгартиради", - дейди Лабрадор.
