Бугун Олимпиаданинг бокс мусобақаларида ярим финал баҳслари бошланади. Ўзбекистонлик 6 нафар иштирокчининг 5 нафари чорак финалгача етиб келганди. Афсуски, ярим финалга бор-йўғи бир спортчимиз чиқа олди, холос.

Бугун Тошкент вақти билан соат 19:15да Аббос Атоев япониялик Рёта Муратага қарши жанг олиб боради. Ушбу спортчилар 2011 йил Бокуда бўлиб ўтган жаҳон чемпионатининг дастлабки босқичида ўзаро баҳс олиб боришганди ва унда Мурата ғалаба қозонганди. Япониялик боксчи ўшанда финалгача етиб боришга муваффақ бўлганди. Демак, оддий рақиб эмас.

Ўзбекистондан фарқли равишда Япония Муратадан ташқари ярим финалда яна бир спортчига эга. Умуман, ярим финалда қайси мамлакат неча нафардан спортчига эга эканини таҳлил қиладиган бўлсак, Украинани алоҳида таъкидлаш лозим. Лондонга 7 нафар боксчи билан ташриф буюрган украиналиклар ярим финалда 5 нафар атлет билан иштирок этади.

Куба, Буюк Британия, Россия делегацияларининг 4 нафардан боксчилари медаллар олиш имконини берадиган босқичга чиқиб келишди. Қозоғистон, Италия ва Ирландиянинг 3 нафардан боксчилари ярим финал баҳсларида иштирок этадиган бўлишди.

Чорак финалда 33 давлатдан боксчилар бор эди, ярим финалга келиб эса 17та давлатнинг спортчилари қолишди.

1. Украина           5 (7*)
2. Куба                 4 (8)
3. Буюк Британия  4 (7)
4. Россия              4 (7)
5. Қозоғистон        3 (9)
6. Италия             3 (7)
7. Ирландия         3 (5)
8. Бразилия         2 (7)
9. Озарбойжон     2 (7)
10. Япония          2 (4)
11. Мўғилистон    2 (4)
12. Ўзбекистон    1 (6)
13. Болгария       1 (3)
14. Хитой           1 (6)
15. Литва            1 (2)
16. Ж.Корея        1 (2)
17. Таиланд        1 (3)
Изоҳ: Олимпиадага келган боксчилар сони.