Сослан Тигиев бронза медали учун баҳсда Габор Хатосни мағлубиятга учратиб, делегациямиз ҳисобига яна бир медални келтирди.


Биринчи бўлим
Тигиев дастлабки бўлимнинг иккинчи дақиқаси ўтиб бораётган вазиятда рақибининг оёғига ҳужум уюштирди ва уни айланиб ўтиб, ўз ҳисобига 1 очко ёзди. Габор қолган вақт давомида Сосланга ҳужум қилди, аммо ҳамюртимиз вазиятдан чиқиб кетиб, бўлимни ўз фойдасига ҳал қилди.

Иккинчи бўлим
Рақиблар тенг кучли бўлишгани учун бир-бирларига нисбатан эҳтиёткорлик билан ҳаракат қилишди. Атлетлар очко ишлаш учун қулай имконият юзага келмади. 2 дақиқа якунига етганидан кейин бош ҳакам ҳамюртимизни назоратчи ҳакамлар олдига чорлади ва қуръа тортишни таклиф қилди. Қизил кийимда ҳаракат қилган 29 ёшли курашчимиз тортган шар ичидан айнан қизил рангдаги кубик чиқди. Демак, Тигиев партерда ишлаш имконини қўлга киритди. Сослан бу имкониятни қўлдан чиқармади ва рақибининг оёғидан ушлаб, 9 сонияда унинг белини ерга текказди. Иккинчи бўлимда ҳам ҳисоб 1:0. Якуний ҳисоб эса — 2:0.

Пекин-да кумуш медални қўлга киритган Сослан Тигиев бу сафар бизга бронза медалини тақдим этди!

Барча ўзбек спорти мухлисларини навбатдаги бронза медали билан табриклаймиз!