Ҳамюртимиз Иброҳимхалил Юлдошев тўп сураётган "Нижний Новгород" жамоаси қишда учта ўқув-машғулот йиғинини режалаштирган.
Клуб матбуот хизмати хабарига кўра, клуб барча йиғинларни Туркияда ўтказади. Жамоа футболчилари 7 январь куни таътилдан қайтиб, шундан сўнг тиббий кўрикдан ўтишади.
"Нижний Новгород" жамоасининг илк йиғини 9-20 январь кунлари Анталияда бўлиб ўтади. Кейинги жамоа икки йиғинни Белек шаҳрида ўтказади. Ўртоқлик учрашувларининг аниқ саналари кейинроқ эълон қилинади.
Россия Премьер-лигасининг 17-тури якунларига кўра, "Нижний Новгород" 19 очко жамғариб, турнир жадвалида 12-ўринни эгаллаб турибди. Жамоа 5 март куни Санкт-Петербургнинг "Зенит" клубига қарши майдонга тушади.
