"ПСЖ" ва Серхио Рамос тузган шартнома шу ёзда якунига етади.
Хабар берилганидек, пойтахт клуби, хусусан, жамоа директори Луиш Кампуш ҳимоячи билан шартномани узайтирмоқчи. Шу билан бирга, Marca нашри хабарига кўра, Саудиянинг "Ан-Наср" клуби Роналду трансферидан сўнг Серхиони ўз сафига қўшиб олишни ўйламоқда.
Рамос Маркиньос билан бирга "Ланс"га қарши ўйинда "ПСЖ" ҳимоясида майдонга тушди. Пойтахт клуби ўша учрашувда 1:3 ҳисобида мағлуб бўлди. Бундай нохуш мағлубиятдан сўнг мухлислар испаниялик футболчининг шартномани узайтириши мумкинлиги ҳақидаги хабарга норози кайфиятда муносабат билдиришди.
Мухлислар ижтимоий тармоқларда ўз ҳис-туйғуларини қуйидагича изҳор қилишди:
“Келинг, Рамос билан бу бемаъни гапларни тўхтатайлик. У энди оёқларини тўғри қимирлата олмайди. У деярли 37 ёшда! Қачон биз ёши катта ўйинчиларни сотиб олишни тўхтатиб, ёш футболчиларга эътибор қаратамиз?
“Рамос билан шартноманинг узайтирилиши ёшларимиз ва бизга қўшилишни истаган бошқа клуб футболчилари учун ёмон сигнал бўлади. Ҳурмат билан айтаманки, Рамос энди Европа гиганти сафида ўйнайдиган даражада эмас”.
“Серхио билан шартномани узайтиришнинг кераги йўқ! Рамос, кет ва ёшларга йўл оч."
“Менимча, Серхио ёш ва истиқболли футболчиларга ўз ўрнини бўшатиши керак. Агар у Роналдунинг янги клуби сафига бориб қўшилса, чиройли якун бўлади. Улар Мадридда узоқ вақт бирга ўйнашди, энди уларнинг дуети яна бирлашиши мумкин.
“Рамос фаолиятини якунлаш вақти келди, Европада у энди юқори савияда ўйнай олмайди. Унинг ўрнига "ПСЖ" Шкриньяр билан шартнома имзолаши керак."
Хўш, сиз мухлислар фикрига қўшиласизми? Серхио "ПСЖ"дан кетса таркибда унинг ўрнини ким эгаллаши мумкин?
