Хабарингиз бор, бугун тажрибали ҳужумчи Шоҳруз Норхонов "Навбаҳор" билан шартнома имзолади. Шундан сўнг, футболчи клуб матбуот хизмати учун қисқача интервью берди. Қуйида мазкур суҳбатни эътиборингизга ҳавола этамиз.

– Шоҳруз, “Навбаҳор”га хуш келибсиз? Жамоамизга сизни ким таклиф қилди?
— Ассалому алайкум. Табрик учун раҳмат. Мени “Навбаҳор”га клуб президенти Отабек Арифович Саматов ва жамоа бош мураббийи Самвел Вячеславович Бабаян таклиф қилишди. Ушбу таклифни иккиланмай, қабул қилиб, жамоа билан шартнома имзоладим.

— “Навбаҳор” таклифини қабул қилишингизга нима сабаб бўлди?
— Жамоа сафига қўшилишимдан асосий мақсад, янги мавсумда “Навбаҳор” таркибида Ўзбекистон чемпионлигини қўлга киритиш. Худо хоҳласа, 2023 йилги мавсумда “Навбаҳор” ўзи иштирок этадиган 3 та фронт, яъни, Coca Cola Суперлигаси, Ўзбекистон кубоги ҳамда Осиё Чемпионлар Лигаси (ОЧЛ) “плей-офф” баҳсларида муваффақиятли тарзда қатнашиб, Ўзбекистон чемпиони ва кубоги соҳибига айланади, ОЧЛда юртимиз шарафини муносиб ҳимоя қилади, деган умиддаман.

— Жамоамиз мухлислари борасида нима дея оласиз?
— Албатта, “Навбаҳор” мухлислари билан ҳам танилган клуб ҳисобланади. Бунгача ўйнаган жамоаларим ўйинларига Намангандаги сингари кўп ишқибозлар ташриф буюришмаган. “Навбаҳор”га ўтишимда ушбу омил, яъни, Наманган футболсеварлар вилояти эканлиги, “Навбаҳор” кўплаб мухлисларга эгалиги ҳам муҳим роль ўйнади. Бўлажак мавсумда жамоамиз ишқибозларини ўз ғалабаларимиз билан хурсанд қиламиз, деган умиддаман.     

Шоҳруз Норхонов – 1993 йил, 13 апрелда Тошкент шаҳрида туғилган.
Футбол билан 8 ёшидан шуғулланишни бошлаган.
Биринчи мураббийи: Дониёр Муродов.
Амплуаси: ҳужумчи.
Тошкентдаги 2—БЎСМда таҳсил олган.
Футболчилик фаолияти: “Оқ—тепа” (Тошкент, 2012—2013 йиллар), “Истиқлол” (Тошкент, 2014 йил), “Обод” (Тошкент, 2015—2016 йиллар), “Бунёдкор” (Тошкент, 2017 йил), “Сўғдиёна” (Жиззах, 2018—2022 йиллар).
2023 йилдан “Навбаҳор”да.
Оилали. Икки фарзанднинг отаси.

“Навбаҳор” ПФК матбуот хизмати.