Хорватия терма жамоаси ва Загребнинг "Динамо" клуби ҳужумчиси Мислав Оршич фаолиятини Англиянинг "Саутгемптон" клубида давом эттиради, деб хабар беради Sky Sports.
Манбага кўра, 30 ёшли хорватиялик футболчи аллақачон Англияда ва трансферни якунлаш учун тиббий кўрикдан ўтган. "Авлиёлар" футболчи учун тахминан 8 миллион фунт тўлаши кутилмоқда.
2022/23 йилги мавсумда Оршич “Динамо” сафида барча мусобақаларда 27 та ўйинда майдонга тушиб, 13 та гол урди ва 8 та голли узатмани амалга оширди. Шунингдек, у Хорватия терма жамоаси таркибида ЖЧ-2022 бронза медали совриндорига айланди.
