Париж-2024 Олимпия ўйинларининг аёллар футболи бўйича Осиё минтақаси 1-босқич саралаш ўйинларига қуръа ташланди.
Ўзбекистон саралашнинг 1-босқичида «А» гуруҳидан ўрин олди. Терма жамоамизга Иордания, Тимор Лесте ва Бутан рақиблик қиладиган бўлди.
Биринчи босқичда жамоалар бугунги қуръа ёрдамида 7та гуруҳга бўлинишди. Гуруҳ ўйинлари бир мамлакат мезбонлик қиладиган. Бу босқич апрель ойида ўтказилади. Гуруҳда биринчи ўринни эгаллаган 7та жамоа 2-босқич йўлланмасини қўлга киритади.
ФИФАнинг 2022 йил декабрь ойидаги аёллар терма жамоалари рейтингида юқори 5та ўринни эгаллаган жамоалар (КХДР, Япония, Австралия, Хитой ва Жанубий Корея) илк босқичдан озод этилган бўлиб, улар саралаш турнирига 2-босқичдан қўшилишади.
Иккинчи босқичда 1-босқичдан ўтган 7та жамоа сафига 5та жамоа қўшилади. 12та жамоа қуръа орқали 3 гуруҳга бўлинади. Бу босқич ўйинларига бир мамлакат мезбонлик қилади. Гуруҳ ғолиблари ва гуруҳда иккинчи ўринни эгаллаганлар орасида энг яхши кўрсаткичга эга бўлган бир жамоа — жами 4 жамоа якуний босқич йўлланмасини қўлга киритишади.
Учинчи босқич. Қуръа ёрдамида 2та жуфтлик ҳосил қилинади. Улар уй-сафар тизимида ўйинларда иштирок этишади. Ғолиб чиққан 2та жамоа Париж-2024 йўлланмасини қўлга киритади.
