Parij-2024 Olimpiya o‘yinlarining ayollar futboli bo‘yicha Osiyo mintaqasi 1-bosqich saralash o‘yinlariga qur’a tashlandi.
O‘zbekiston saralashning 1-bosqichida «A» guruhidan o‘rin oldi. Terma jamoamizga Iordaniya, Timor Leste va Butan raqiblik qiladigan bo‘ldi.
Birinchi bosqichda jamoalar bugungi qur’a yordamida 7ta guruhga bo‘linishdi. Guruh o‘yinlari bir mamlakat mezbonlik qiladigan. Bu bosqich aprel oyida o‘tkaziladi. Guruhda birinchi o‘rinni egallagan 7ta jamoa 2-bosqich yo‘llanmasini qo‘lga kiritadi.
FIFAning 2022 yil dekabr oyidagi ayollar terma jamoalari reytingida yuqori 5ta o‘rinni egallagan jamoalar (KXDR, Yaponiya, Avstraliya, Xitoy va Janubiy Koreya) ilk bosqichdan ozod etilgan bo‘lib, ular saralash turniriga 2-bosqichdan qo‘shilishadi.
Ikkinchi bosqichda 1-bosqichdan o‘tgan 7ta jamoa safiga 5ta jamoa qo‘shiladi. 12ta jamoa qur’a orqali 3 guruhga bo‘linadi. Bu bosqich o‘yinlariga bir mamlakat mezbonlik qiladi. Guruh g‘oliblari va guruhda ikkinchi o‘rinni egallaganlar orasida eng yaxshi ko‘rsatkichga ega bo‘lgan bir jamoa — jami 4 jamoa yakuniy bosqich yo‘llanmasini qo‘lga kiritishadi.
Uchinchi bosqich. Qur’a yordamida 2ta juftlik hosil qilinadi. Ular uy-safar tizimida o‘yinlarda ishtirok etishadi. G‘olib chiqqan 2ta jamoa Parij-2024 yo‘llanmasini qo‘lga kiritadi.
