Хабарингиз бор, бугун, яъни, 17 август куни Ўзбекистон 21-миллий чемпионатининг 16-тур ўйинларига старт берилади.
Иккинчи даврада кетма-кет икки марта ғалаба қозонган Ғузорнинг “Шўртан” клуби 16-тур доирасидан ўрин олган учрашувни ўз майдонида Андижоннинг “Андижон” жамоасига қарши ўтказади.
Бугун саҳар тонгда Қарши шаҳрига етиб келган “Андижон” делегациясида бир қатор йўқотишлар бор. Биринчи даврани Ғузорнинг “Шўртан” клубида ўтказиб, иккинчи даврада “Андижон” сафига бориб қўшилган Отабек Валижонов “Бунёдкор” ва “Навбаҳор” жамоаларига қарши ўтказилган баҳсларда ҳакамлар томонидан огоҳлантирилди. Натижада, иккита сариқ карточкани “қўлга киритган” Валижонов биринчи даврада “Шўртан” жамоаси таркибида ҳам икки марта огоҳлантиришга тортилган эди. Бу эса ўз-ўзидан унинг огоҳлантиришлари сони 4 тага етганини билдиради ва ярим ҳимоячи эртага бўладиган “Шўртан”-“Андижон” жамоалари ўртасидаги баҳсни ўтказиб юборишга мажбур.
Шунингдек, “Андижон” жамоасининг ўнг қанот ярим ҳимоясида жуда ҳам ишончли ўйин кўрсатаётган Рустам Аъзамов ҳам делегация билан бирга Қарши шаҳрига ташриф буюрмаган. Сабаби, футболчи жароҳат олган ва бу ярим ҳимоячи ҳам эртанги учрашувда майдонга туша олмайди.
Чемпионат бошида “Олмалиқ” клубидан сотиб олинган ва иккинчи давра бошланиши арафасида “Андижон” жамоасига ижарага бериб юборилган Мўйдин Мамазулумов “Футбол-МЕД” текширувларидан ўта олмаганлиги сабабли, “Бунёдкор” ҳамда “Навбаҳор” жамоалари қарши ўтказилган учрашувларни ўтказиб юборган эди. Ҳужумчи маълум вақт даволаниш билан банд бўлди ва “Футбол-МЕД” текширувларидан муваффақиятли ўтди. Натижада, ЎзПФЛнинг “Мусобақалар ўтказиш бўлими” ходимлари Мамазулумовнинг майдонга тушишига рухсат беришди. Эртага бўладиган учрашувда Мўйдин Мамазулумов собиқ жамоасига қарши майдонга тушиш имкониятига эга бўлди.
Эслатиб ўтамиз, “Шўртан” ҳамда “Андижон” жамоалари ўртасидаги баҳс 17 август куни соат 18:45да “Ғузор” марказий стадионида бошланади.