«Брентфорд» бош мураббийи Томас Франк украиналик ҳужумчи Михаил Мудрикнинг «Шахтёр»дан «Челси»га ўтиши ҳақида гапирди.

Эслатиб ўтамиз, лондонликлар 22 ёшли вингер учун 70 миллион евро тўлашди. Бундан ташқари, Донецк клуби яна 30 миллион бонус олиши мумкин бўлади.

Мутахассиснинг фикрича, эндигина фаолиятини бошида турган ёш футболчи учун 100 миллион евро жуда юқори нарх.

«Ташқаридан қараганда, менга Мудрик ҳақиқатан ҳам яхши футболчидек туюлади, аммо имкониятлари ҳали номаълум бўлган футболчи учун 100 миллион евро жуда кўп.

У, эҳтимол, анча яхшиланиши мумкин, аммо бу замонавий футболдаги нарх ўсиб боришининг турли белгиларидир», - дея Френкнинг сўзларини келтиради Sky Sports.

Жорий мавсумда Мудрик «Шахтёр» сафида 18 та ўйин ўтказиб, 10 та гол урди ва 8 та голли узатмани амалга оширди. Transfermarkt портали ёш ҳужумчини 40 миллион еврога баҳоламоқда.