"Ювентус" устози Массимилиано Аллегри "Аталанта"га қарши кечган ва 3:3 ҳисобида якунланган учрашув ҳақида гапирди.
Туринликлар учрашув давомида икки марта ҳисобда ортда қолган бўлса-да, якунда дуранг ўйнашга муваффақ бўлди.
"Жамоанинг муносабатидан мамнунман. Хатоларимиз учун жазоландик, лекин биз ўйинда қолдик ва вазиятни ўзгартира олдик. Учрашув 2:5 ҳисобида "Аталанта" фойдасига ҳал бўлиши мумкин эди, аммо биз ўз имкониятларимиздан унумли фойдаландик.
Биз майдон ташқарисида бўлаётган воқеалар билан чалғиб қолишимиз мумкин эмас. Футболчиларни ўз муносабати учун фақат мақташим мумкин. Клубда бўлаётган воқеаларни ҳисобга олсак, диққатни жамлаш осон бўлмади, аммо бугун жамоа жорий мавсум бошида бошлаган ишимизни давом эттириш истагини кўрсатди", - деди Аллегри ўйиндан кейин.
