"Атлетико" дарвозабони Ян Облак "Реал"га қарши Испания кубоги чорак финал учрашувида (1:3) бош ҳакамнинг "қироллик клуби" ярим ҳимоячиси Даниэль Себальосга иккинчи сариқ карточкани кўрсатмаслик ҳақидаги қарорини танқид қилди.
"Менимча, бу четлатиш эди. Ҳакам "Реал" футболчисини майдондан четлатиши керак эди. Биз 1:0 ҳисобида олдинда бўлганимизда Себальосга иккинчи сариқ карточкани кўрсатиши керак эди. Лекин улар бошқача қарорга келишди. Биз бунга аллақачон ўрганиб қолганмиз. Қийин бўлди, аммо жамоа охиригача курашди, биз гол уриш учун ҳамма нарсани қилдик", - деди дарвозабон Marca билан суҳбатда.
Эслатиб ўтамиз, ҳакам “Атлетико” ҳимоячиси Стефан Савичга иккита сариқ карточка кўрсатиб, майдондан четлатди. "Матрасчилар" озчиликда қолганидан кейин "Реал" қўшимча вақтда иккита гол урди.
