"Челси" "Бенфика" ярим ҳимоячиси Энцо Фернандес трансфери бўйича музокараларга қайтди. Журналист Фабрицио Романонинг ижтимоий тармоқдаги саҳифасида маълум қилишича, "кўклар" футболчини ҳар қандай ҳолатда ҳам сотиб олмоқчи ва Лиссабон клуби унинг шартномасидаги банд сифатида талаб қилаётган 120 миллион еврони тўлашга тайёр.

"Бенфика" президенти Руи Кошта ҳамон қишда футболчининг кетишига рози бўлишни истамаяпти, бироқ "Челси" трансфер ойнасининг қолган соатларида шартнома имзолашга интилади. Лондон клуби раҳбарияти "Брайтон" ярим ҳимоячиси Моисес Кайседо ва "Эвертон" ярим ҳимоячиси Амаду Онана билан шартнома имзоламагач, майдон марказидаги позицияни мустаҳкамламоқчи.