"Наполи" ҳужумчиси Жованни Симеоне ва унинг отаси, "Атлетико" бош мураббийи Диего Симеоне Италия А Сериясида жами 100 ва ундан ортиқ гол урган бешинчи оила вакилларига айланишди. Бу ҳақда италиялик журналист Жузеппе Пасторе хабар берди.
"Пиза", "Интер" ва "Лацио" клубларида тўп сурган Диего Симеоне Италиядаги фаолияти давомида 30 та гол урган. "Женоа", "Фиорентина", "Кальяри", "Верона" ва "Наполи" клубларида ўйнашга муваффақ бўлган Жованни ҳисобида 70 та гол бор. Шу тариқа Симеонелар оиласи вакиллари А Серияда 100 та голга эга бўлишди.
А Сериянинг энг яхши бешта тўпурар оиласи қуйидагича:
Маццола - 221 гол (Сандро - 116, Валентино - 93, Ферруччо - 12);
Савольди - 180 та гол (Жузеппе - 168, Жанлуиджи - 7, Жанлука - 5);
Кьеза - 174 гол (Енрико - 138, Федерико - 36);
Вьери - 160 та гол (Роберто - 18, Кристиан - 142);
Симеоне - 100 та гол (Диего - 30, Жованни - 70).
