"Ювентус" ҳужумчиси Душан Влахович яқин орада туринликлар жамоасини тарк этиши мумкин, деб хабар беради Calciomercato.it.
Манбанинг хабарига кўра, "Юве" раҳбарияти клубга нисбатан санкциялар қўлланилганидан сўнг бюджетдаги муаммолар туфайли сербиялик ҳужумчи билан хайрлашишга тайёр. Италияликлар ҳужумчининг трансфери учун камида 80 миллион евро олишни режалаштирмоқда.
Аввалроқ, сербнинг хизматларига "Арсенал", "Челси" ва "Манчестер Юнайтед" клублари қизиқиш билдираётгани хабар қилинганди.
Влахович “Ювентус”да 2022 йилнинг январидан буён тўп суради. Унинг Италия жамоаси билан амалдаги шартномаси 2026 йилгача мўлжалланган.
Олдинроқ унинг агенти футболчи қишки трансфер ойнасида "Ювентус"ни тарк этиши мумкинлигини айтганди.
Жорий мавсумда 23 ёшли серб Турин клуби сафида барча турнирлар доирасида 16 та ўйин ўтказиб, 7 та гол урди ва 2 та голли узатмани амалга оширди. Transfermarkt порталига кўра футболчининг нархи 80 миллион еврога баҳоланмоқда.
