"Ливерпуль" 31 ёшли ҳужумчиси Роберто Фирмино билан шартномани узайтирмоқчи, аммо қисқа муддатга. Бу ҳақда италиялик журналист Фабрицио Романо ижтимоий тармоқлар орқали маълум қилди.
Манба берган хабарга кўра, "Ливерпуль" бош мураббийи Юрген Клопп бразилиялик футболчини ўз жамоасида олиб қолишни истайди, бироқ мураббий бу футболчининг узоқ муддатда фойдали бўлиши мумкинлигига ҳали ишончи комил эмас.
Эслатиб ўтамиз, ёзда Фирмино "Ювентус"га ўтишга яқин келганди, аммо келишув амалга ошмади. Бу мавсумда Роберто "Ливерпул"нинг асосий ўйинчиси бўлмаслигига қарамасдан, АПЛда 7 та гол уришга муваффақ бўлди.
