Ўзбекистон чемпионатининг 17-туридан ўрин олган "Пахтакор" ва "Шўртан" учрашуви голсиз дуранг билан якунланди.
Учрашув ҳар икки томоннинг ташаббусни қўлга олишга интилиши билан бошланди. Меҳмонлар ўз услубларига содиқ қолган ҳолда тўпни назорат қилиш бўйича устунликка эришишни хоҳлашди. Лекин майдон эгалари бундай ҳолатга рози бўлмадилар, ғузорликларни таъқиб қилишга тушишди. Натижада баъзи лаҳзаларда “Шўртан”га тўп билан муомала қилиш насиб этди, баъзида йўқ. Илк хавфли ҳолат Суюновнинг узоқ масофадан тўпни дарвозага тепгани билан содир бўлди. Чинакамига кескин вазиятлар дастлабки 15 дақиқадан кейин юзага келишни бошлади. Клецковнинг бурчакдан етказиб берилган тўпни дарвозага йўллашга уриниши ноаниқ чиқди. Бош билан берилган зарбадан сўнг тўп дарвоза устуни ёнгинасидан ўтиб кетди. 22-дақиқада Эркиновда собиқ жамоасини жазолаш имконияти бўлганди, бироқ ҳимоячи таъқибидан халос бўлишни уддалаган Шаҳбоз яқин масофадан ноаниқ зарба берди. Ўткир бурчак остида қолган ҳужумчи асосий эътиборни зарба кучига қаратгани боис вазият қўлдан бой берилди. Бу орада меҳмонларнинг тезкор қарши ҳужуми хавфли тус олди, бироқ иш зарба йўллашгача етиб бормади. 31-дақиқада чиройли комбинациядан кейин Суюнов жарима майдони чизиғи устидан, ён тарафдан зарба берди. Лекин тўп устун ёнидан ўтиб, майдон ташқарисига йўл олди. Меҳмонлардан Тожиев Лобановни доғда қолдиришга уринди, бироқ Фарҳоднинг зарбасига ҳам аниқлик етишмади. Козак ва Суюновнинг аниқ зарбаларига йўлига Наумов ғов бўлди. Кескин курашларга бой бўлса-да, хавфли ҳолатларни кам тақдим этган биринчи бўлимда "Пахтакор"нинг устунлиги сезилиб турди. Лекин бу яққол бўлмаганини таъкидлаш жоиз.
Иккинчи бўлимни меҳмонлар устози бир ўзгариш қилиш билан бошлаб, Агбо ўрнига Пономарёвни туширди. “Пахтакор” тўпни ушлаб туриш ҳамда ҳужумга отланиш борасида фаолликни янада кучайтирди, лекин меҳмонлар ҳимояда жуда хотиржам ҳаракат қилиб, ҳужумларнинг кескин тус олишига йўл қўйишмади. Андреевнинг жарима майдони ташқарисидан тепгани тўпини Наумов қайтариб юборди. Мурод Исмоилов вазиятни ўзгартириш мақсадида Каримов ўрнига Махситалиевни майдонга туширди. Чунки шерларнинг ҳужумдаги ишлари у қадар юришмай қолганди. Сал ўтгач, майдонда Абдухолиқов ҳам пайдо бўлиб, мезбонлар икки ҳужумчи билан ўйнаш тактикасига ўтишди. Бир ҳолатда Эркинов дарвоза олдида тўпни кутмагани боис ўтказиб юборди. Майдонга тушиши билан Шарофетдинов қулай имкониятдан фойдалана олмади. Қулай вазиятларни юзага келтирган бўлишларига қарамай, пахтакорчилар бундан самара чиқара олишмади. Беллашувда голсиз дуранг қайд этилди.
«ПАХТАКОР» «ШЎРТАН» 0:0
Пахтакор: Лобанов, Суюнов, Клецков, Кримец, Ҳошимов, Козак, Махарадзе, Қиличев (Абдухолиқов, 66), Ш.Каримов (Махситалиев, 61), Андреев, Эркинов (Шарофетдинов, 72).
Шўртан: Наумов, Жўрабоев, Алиқулов, Ҳ.Каримов, Мерзляков, Соро, Афонин, Таран (Крушельницкий, 77), Агбо (Пономарёв, 46), Убайдуллаев, Тожиев (Клишин, 90+1).
Огоҳлантиришлар: Алиқулов, 27. Тожиев, 39. Кримец, 51.
Ҳакамлар: Р.Бобомуродов, Т.Абдуллаев, А.Цапенко.
Назоратчи: Б.Галеев.
