«Пахтакор» Туркиядаги йиғин доирасида Киевнинг "Динамо" клубига қарши назорат учрашувини ўтказди. Пахтакорчилар 2022 йилги мавсум аввалида ҳам ушбу жамоа ўртоқлик учрашувида майдонга чиққан эди. Ёдингизда бўлса, ўша баҳс жанговар дуранг билан якунига етганди.

Қизиғи, бу сафар "Пахтакор" киевликлар билан йиғин давомида битта меҳмонхонада истиқомат қилди. Максим Шацких иккинчи йиғин одатига кўра, битта таркибни 90 дақиқа ўйнатди.

34-дақиқада ҳисоб очилди. Шацких ва мураббийлар штабининг меҳнати мана шу голда яққол кўринди: тўп рақибга тегмаган ҳолда, 10 нафар футболчининг ўзаро узатмаларидан кейин рақиб дарвозаси тўридан жой олди. Банашакнинг ошириб берган тўпини Достон Ҳамдамов оҳиста дарвозага йўналтириб қўйди. Бўлим сўнгида икки жамоада ҳам биттадан яхши вазият бўлди, аммо бесамар.

65-дақиқага келиб жаҳон мураббийлари ичида соврин ютиш бўйича юқори ўринда турувчи Мирча Луческу 11 нафар ўйинчисини алмаштирди.

Учрашувда биронта захирадан фойдаланмаган Максим Шацких, тонгги машғулотларни ҳам ўз одатига кўра 1,5 соат ўтказганди. Кучли жисмоний толиқишга қарамай, йигитларимиз мухлисларга бугун чиройли ўйин намойиш қилиб бера олишди.

"ПАХТАКОР" - "Динамо" (Киев, Украина) 1:0
Гол: Достон Ҳамдамов (34).
"Пахтакор": Суюнов, Алижонов, Турсунов, Азмиддинов, Сайфиев, Ҳамробеков, Собирхўжаев, Ҳамдамов, Черан, Турғунбоев, Банашак.