«Paxtakor» Turkiyadagi yig‘in doirasida Kiyevning "Dinamo" klubiga qarshi nazorat uchrashuvini o‘tkazdi. Paxtakorchilar 2022 yilgi mavsum avvalida ham ushbu jamoa o‘rtoqlik uchrashuvida maydonga chiqqan edi. Yodingizda bo‘lsa, o‘sha bahs jangovar durang bilan yakuniga yetgandi.

Qizig‘i, bu safar "Paxtakor" kiyevliklar bilan yig‘in davomida bitta mehmonxonada istiqomat qildi. Maksim Shaskix ikkinchi yig‘in odatiga ko‘ra, bitta tarkibni 90 daqiqa o‘ynatdi.

34-daqiqada hisob ochildi. Shaskix va murabbiylar shtabining mehnati mana shu golda yaqqol ko‘rindi: to‘p raqibga tegmagan holda, 10 nafar futbolchining o‘zaro uzatmalaridan keyin raqib darvozasi to‘ridan joy oldi. Banashakning oshirib bergan to‘pini Doston Hamdamov ohista darvozaga yo‘naltirib qo‘ydi. Bo‘lim so‘ngida ikki jamoada ham bittadan yaxshi vaziyat bo‘ldi, ammo besamar.

65-daqiqaga kelib jahon murabbiylari ichida sovrin yutish bo‘yicha yuqori o‘rinda turuvchi Mircha Luchesku 11 nafar o‘yinchisini almashtirdi.

Uchrashuvda bironta zaxiradan foydalanmagan Maksim Shaskix, tonggi mashg‘ulotlarni ham o‘z odatiga ko‘ra 1,5 soat o‘tkazgandi. Kuchli jismoniy toliqishga qaramay, yigitlarimiz muxlislarga bugun chiroyli o‘yin namoyish qilib bera olishdi.

"PAXTAKOR" - "Dinamo" (Kiyev, Ukraina) 1:0
Gol: Doston Hamdamov (34).
"Paxtakor": Suyunov, Alijonov, Tursunov, Azmiddinov, Sayfiyev, Hamrobekov, Sobirxo‘jayev, Hamdamov, Cheran, Turg‘unboyev, Banashak.