Ван Нистелрой "МЮ" тарихидаги энг яхши марказий ҳужумчилардан бири ҳисобланади. Унинг ўрнини тўлдириш доимо қийин бўлган. Собиқ нидерланд футболчиси "қизил иблислар сафида жами 219 ўйинда 150 та голга муаллифлик қилган эди. Қуйида ван Нистелройдан кейинги даврда "МЮ"нинг ҳужум чизиғида кимлар ҳаракат қилганини билиб оласиз.
1. Робин ван Перси
"Арсенал"дан 2012 йилнинг ёзида сотиб олинган футболчи, "МЮ"даги илк мавсумидаёқ жамоага чемпионлик олиб келган эди. 2013 йилда Сер Алекс Фергюсон ван Перси ҳақида шундай деган: "Жамоага таъсир борасида ван Персининг ўрни жуда ҳам юқори бўлди. Мен тарихда ундан бошқа бирор бир футболчи кўрмаганманки, жамоага тез мошлашиб кетган. Ҳа, биз ундан кўп нарса кутган эдик. Ўйлайманки, ван Перси умидларимизни пуч қилмади".
Робин ван Перси Фергюсондан кейинги даврда ўз даражасини сақлаб қола олмади. У Дэвид Мойес ва Луи ван Гал даврларида анча қийинчиликларга дуч келди. Шу сабабли нидерландиялик ҳужумчи 2015 йилда "Фенербахче"га сотиб юборилади.
2. Хавьер Эрнандес
Эрнандес 2010 йилда Фергюсон томонидан жамоага жалб этилади. У Мексиканинг "Чивас де Гвадалахара" клубидан харид қилинганди. Хавьер ўзининг "МЮ"даги дебют мавсумини 20 та гол билан якунлайди. Мексикалик ҳужумчи кейинги мавсумларда ҳам яхши ҳаракат қилади. Бироқ, кўп ўтмай муваффақиятсизликка дуч келиб, 2015 йилда "Байер Леверкузен"га сотиб юборилади.
3. Димитр Бербатов
Бербатов 2008 йилда "Манчестер Юнайтед" томонидан рекорд суммага харид қилинган. Больгариялик футболчи мухлислар танқидига дучор бўлади, негаки у жуда секин ҳаракат қиларди. Шунга қарамай, Бербатов "МЮ"га иккита Англия чемпионлиги келтиришда катта ёрдам берган. 2011 йилда эса ҳужумчи "Олтин бутса" совринини қўлга киритади. Бутун дунё Бербатовни "Ливерпуль" дарвозасига урган қайчи зарбали голи билан эслайди. 2012 йилда Робин ван Персининг келиши Бербатовга чиқиш эшиклари кўрсатилишига сабаб бўлган эди. У ўшанда "Фулхэм" сафига йўл олган.
4. Карлос Тевес
Тевес "Вест Хэм"дан "МЮ"га ўтади ва у ерда энг хавфли ҳужумчилардан бирига айланади. Бу йўлда унга Роналду ва Руни катта ёрдам берган. Аргентиналик футболчи 2007-2009 йиллар давомида иккита АПЛ ва ЕЧЛ бош совринларини қўлга киритиб, мухлислар олқишига сазовар бўлган. Тевеснинг кейинги манзили "Манчестер Сити" бўлганди.
5. Ибрагимович
Златан "МЮ"га 34 ёшида эркин агент сифатида келиб қўшилганди. Ўшанда кўпчилик уни АПЛда ўйнаш учун қарилик қилади деб ўйлаган. Аммо швециялик ҳужумчи биринчи мавсумидаёқ мухлислар фикрини хато эканини исботлаб берди ва 2016-17 йили лига кубоги ва Европа лигасини ютди. Ибрагимович тиззасидан жароҳат олгани сабабли Англияда муаммоларга дуч келиб, 2018 йилда МЛСга кетишга мажбур бўлди.
6. Энтони Марсьяль
2015 йилда "Монако"дан Марсьяль исмли ҳужумчи сотиб олинган. Унинг дебют ўйини "Ливерпул"га қарши кечди ва у ўша баҳсда гол уришга эришди. Француз футболчиси клуб учун жами 84 голга муаллифлик қилди. Бироқ, ҳеч ким унинг ўйинларидан таскин топмасди. Негаки, Марсьялдан кутилган катта нарсалар амалга ошмаганди. Ҳозирча Эрик тен Хаг Марсьялни жамоада сақлаб турибди. Аммо бу, у учун сўнгги имкон бўлиши мумкин.
7. Криштиану Роналду
Роналду "Манчестер Юнайтед"ни 2009 йилда тарк этганида, техника ва тезликка эга вингер эди. Аммо у 2021 йилда "қизил иблислар" сафига марказий ҳужумчи сифатида қайтади. Афсуски, Роналду ўзининг эски даври соясида қолиб кетди. Роналдунинг жамоадаги дастлабки мавсуми омадлироқ кечганди. Аммо кейингиси акс таъсирга эга бӯлди. Якун ҳам шунга яраша эди.
8. Эдинсон Кавани
2020 йилнинг ёзида Кавани эркин агент сифатида жамоага олиб келинади. У тезда мухлисларнинг ёқимтойига айланган. Негаки, уругвайлик ҳужумчи унумдор иш даражасига эга бўлган. Кавани дастлабки мавсумда 39 ўйинда 17 та голга муаллифлик қилган. Роналдунинг келиши сабабли 2021-22 йилги мавсум у учун омадсиз кечади ва "Валенсия"га йўл олади.
9. Ромелу Лукаку
Бельгия терма жамоаси аъзоси 2017 йилда 75 миллион фунт эвазига "Эвертон"дан харид қилинади. Лукаку ўзининг илк мавсумида "қизил иблислар" учун 27 та гол уришга муваффақ бўлди. Аммо доимгидек, Лукаку иккинчи мавсумда омадсизликка учраганди. У бош мураббий Оле Гунар Сульшер билан келишмай қолиб, орадан кўп ўтмай "Интер"га сотиб юборилади.
10. Майкл Оуэн
"Ливерпул"да супер-юлдузга айланган Майкл Оуэн 2009 йилда катта шов-шувга сабаб бўлган трансфер асосига айланди. У "Манчестер Юнайтед"га ўтади. Оуэн уч мавсум давомида "қизил иблислар" учун жами 17 тагина гол уришга эришди холос. Аммо у ҳозир ҳам мухлислар томонидан "Манчестер Сити"га қарши урган фантастик голи билан эсланади.
ИСМАТОВ Ж.
