Туркиянинг Истанбул шаҳрида давом этаётган шахмат олимпиадасида Ўзбекистон аёллар терма жамоаси илк марта мағлубиятга учради.

Қизларимиз ушбу олимпиадада 13-рейтинг кўрсаткичга эга бўлган Болгария терма жамоаси аъзоларига қарши баҳсларда 1,5-2,5 ҳисобида имкониятни бой беришди. Учта доскада дуранг қайд этилган бўлса, Ҳулкар Тоҳиржонова рақибига ютқазиб қўйди.

Доскалар бўйича натижалар билан танишинг:
Ўзбекистон - Болгария - 1,5-2,5
Нафиса Мўминова - Антоанета Стефанова 0,5-0,5
Ирина Геворгян - Ива Виденова 0,5-0,5
Ҳулкар Тоҳиржонова - Адриана Николова 0-1
Нодира Нодиржонова - Элица Раева 0,5-0,5

3-турдан кейин 18-ўринни эгаллаб турган қизларимиз, Болгариядан учралган мағлубиятдан кейин 34-ўринга тушиб кетди. Терма жамоамиз бугун колумбиялик аёлларга қарши дона суришади. Рақиб терма жамоаси мусобақада 34-рейтингга эга (Ўзбекистон рейтинги эса - 35). Улар мусобақа жадвалида 36-ўринни банд этиб турибди.