Лондон (Буюк Британия)да ўтаётган Паралимпия ўйинларида бугун яна бир ҳамюртимиз мусобақаларга киришди.
Енгил атлетика бўйича 100 метр масофага югуриш мусобақаларида Ватанимиз шарафини ҳимоя қилаётган Муяссар Ибрагимова, белгиланган масофани 12,80 сония босиб ўтди ва ярим финал баҳсларига йўлланма олди.
Таъкидлаш жоизки, саралаш мусобақалари ўта муросасиз руҳда кечди ва Олимпия стадионига йиғилган 80.000 мухлис, бирин-кетин тўрт бор жаҳон рекордларини янгиланганлигининг шоҳиди бўлдилар.
Дастлаб, украиналик Оксана Батурчик 12,24 сония натижа кўрсатиб, рекорд кўрсаткични 0,08 сонияга яхшилади. Шундан сўнг британиялик Клеж рекорд натижани 12,17 сония, хитойлик Дагинг Зу эса 12,13 сонияга янгилашга муваффақ бўлдилар. Энг сўнгги гуруҳда стартга чиққан ҳитойлик Гуахуа Зоу рекорд кўрсаткични бир йўла 0,22 сонияга (11,91) янгилаб, барчанинг ҳайратини оширди.
Саралаш мусобақаларида 9-натижани қайд этган Муяссар Ибрагимованинг шахсий рекорд кўрсаткичи 12, 26 сонияни ташкил қилади.
Ярим финал мусобақалари бугун кечки дастурдан ўрин эгаллаган. Агарда ҳамюртимиз, ушбу босқичдан ҳам муваффақиятли ўтса, 2 сентябр куни Паралимпия ўйинларининг медаллари ўйналадиган финал мусобақасига қатнашади.
Бу йўлда истеъдодли спортчимизга омад ва зафарлар тилаб қоламиз.
Шавкат Жалилов
Лондон шаҳридан махсус тайёрланди
